Маңғыстау облысына жұмыс сапары
Сенаттың Әлеуметтік-мәдени даму және ғылым комитетінің депутаттары Маңғыстау облысында көшпелі отырыс өткізді. Онда «Қазақстандық ішкі туризмді дамыту – уақыт талабы» тақырыбы бойынша парламенттік тыңдауға дайындық аясында кездесу болды.
Комитет төрағасы Мұрат Бақтиярұлы көшпелі отырыстың негізгі мақсаты – туризмді дамыту және Маңғыстау облысындағы тарихи-мәдени мұраны сақтаудың келешегін талқылау екенін атап өтті.
«Бүгінде елімізде туризмді дамытудың 2019-2025 жылдарға арналған мемлекеттік бағдарламасы жұмыс істейді. Оның негізгі мақсаты – мемлекет экономикасындағы туристік саланың мультипликативті әсерін арттыру үшін нормативтік базаны қалыптастыру. Біз бұл тетіктерді еліміздің туристік өңірлерінде жүзеге асыру маңызды деп санаймыз», - деді Мұрат Бақтиярұлы.
Маңғыстау облысы әкімінің орынбасары ішкі туризмді дамыту туралы баяндама жасады. Ал тарихи-мәдени мұраны сақтаудың проблемалары мен шешу жолдары туралы Мәдениет және спорт министрлігі Индустрия және туризм комитетінің өкілі баяндады.
Сенаторлар кездесуге қатысқан облыстық және қалалық мәслихат депутаттарымен, сондай-ақ туристік ұйымдардың өкілдерімен туризмді дамытудың өзекті мәселелерін талқылады.
Сенат депутаттары сонымен қатар Әбіш Кекілбаевтың ескерткішіне гүл шоқтарын қоюға қатысты және Ақтау қаласының кейбір туристік кәсіпорындарының жұмысымен танысты.