Бибігүл Жексенбай жаңа Конституцияның жобасын Қаржы министрлігінің ұжымымен талқылады
Сенатор Қаржы министрлігінің ұжымымен кездесуде еліміздің экономикалық және қаржы жүйелері үшін конституциялық реформалардың маңыздылығына тоқталды. Оның айтуынша, билік тармақтарының есептілігі мен тепе-теңдік қағидаттарын нығайту бюджет және салық саясатының ашықтығын арттыруға, сондай-ақ мемлекеттік институттарға деген сенімді нығайтуға ықпал ететін болады.
«Қаржы жүйесі мемлекеттік институттардың тұрақтылығы мен басқарудың тиімділігін көрсетеді. Конституциялық реформалар экономиканы одан әрі дамыту және еліміздің инвестициялық тартымдылығын арттыру үшін берік құқықтық негіз жасайды», - деп атап өтті сенатор.
Талқылау барысында сондай-ақ азаматтар мен кәсіпкерлердің құқықтарын қорғау, сондай-ақ Конституцияда еліміздің экономикалық егемендігіне байланысты негізгі ережелерді бекіту мәселелері қозғалды.
Кездесу соңында Бибігүл Жексенбай алдағы референдум Қазақстанның саяси жүйесін жаңғыртудың маңызды кезеңі болып табылатынын атап өтіп, қатысушыларды белсенді азаматтық ұстаным танытуға шақырды.
