ҚР Парламенті Сенаты Төрағасының орынбасары Асқар Шәкіров Корея Республикасы Ұлттық Жиналысындағы Парламентаралық достық тобының төрағасы У Вон Шикпен кездесті.
Келіссөз барысында Қазақстан басшысының 2021 жылы Корея Республикасына сапары кезінде қол жеткен уағдаластықтар аясында екі ел арасындағы ынтымақтастықты, оның ішінде парламентаралық өзара іс-қимылды одан әрі нығайту мәселелері талқыланды.
Тараптар біздің елдеріміздің сауда-экономикалық және инвестициялық салалардағы ынтымақтастығының қарқынды дамуын атап өте келіп, мәдени-гуманитарлық байланыстарды тереңдетудің маңызына тоқталды.
Жүздесушіге Қазақстандағы конституциялық реформаның мән-маңызы туралы ақпарат айтылды. «Бүгінде біздің еліміз өз дамуындағы тарихи маңызды кезеңде тұр. Президент Қасым-Жомарт Тоқаевтың жаңғырту жөніндегі күн тәртібі жүзеге асуда, онда барлық өзгерістер қамтылып отыр. Еліміздің саяси жүйесін одан әрі демократияландыру – басты бағыттардың бірі болып табылады», - деді Асқар Шәкіров.
У Вон Шик Қазақстандағы демократиялық реформалар Кореяда мұқият қадағаланып отырғанын және оларды құптайтынын атап өтті.
Кездесу қорытындысы бойынша парламентаралық ынтымақтастық байланыстары бойынша одан әрі өзара іс-қимыл жасау туралы уағдаластыққа қол жеткізілді.
(Сенаттың Баспасөз қызметі, 74-72-27)
