"КҮРЕ ЖОЛ – КҮРЕТАМЫР" - Егемен Қазақстан 17 мамыр 2016 жыл
«Егемен Қазақстан»
17.05.2016 жыл
КҮРЕ ЖОЛ – КҮРЕТАМЫР
Парламент Сенатындағы «Өңір» депутаттық тобының дөңгелек үстел отырысында Қазақстан Президентінің «Нұрлы Жол – болашаққа бастар жол» Жолдауындағы автомобиль жолдары құрылысы бөлігін іске асырудың аралық нәтижелері және Қазақстанның 2015-2019 жылдарға арналған инфрақұрылымдық дамыту мемлекеттік бағдарламасы аясында көлік-логистика инфрақұрылымын қалыптастырудың келешегі талқыланды.
Сенат Төрағасы Қасым-Жомарт Тоқаев отырысқа қатысушыларға арнап сөз сөйледі. Жоғарғы палатаның басшысы біздің елімізді инфрақұрылымдық тұрғыда түбегейлі жаңғырту арқылы экономиканы елеулі түрде өркендету ісінде Президент Н.Назарбаев жария еткен Жаңа экономикалық саясаттың қағидалық маңызын атап өтті.
Сенат Төрағасы автомобиль жолдары құрылысы бағдарламасын іске асыру барысындағы өзекті мәселелерге тоқталды. Қ.Тоқаевтың айтуынша, көптеген автомобиль жолдарының сапасын жақсарту қажет, ауылдық жерлердегі жолдар жаңғыртуды, жол құрылыстарында озық технологияларды пайдалану жөнінде ауқымды жұмыстар атқаруды талап етеді. Жоғарғы палатаның басшысы жолдардың құрылысы мен жөндеу жұмыстарында автомобиль саласының мамандарымен кері байланысты қамтамасыз етудің маңызы зор екеніне назар аударды.
«Нұрлы Жол» – маңызы өте ауқымды стратегиялық бағдарлама, бұл құжат Қазақстанның алға қарай дамуына үлкен серпіліс береді. Осы мәселелер шын мәнінде бүкіл қоғамның назарында тұр. Сондықтан, біз бәріміз, Үкімет болсын, Парламент болсын, бұл жұмысты нәтижелі түрде атқаруымыз керек, деді Қ.Тоқаев.
Инвестициялар және даму министрі Әсет Исекешев «Нұрлы Жол» мемлекеттік бағдарламасы аясында автомобиль жолдары жобаларын іске асыру барысы туралы баяндады. Оның айтуынша, барлық жобалар іске асырылғаннан кейін тасымал көлемі 2,5 есе артады, оның елеулі экономикалық қайтарымы ғана емес, ауқымды әлеуметтік әсері мол болады. «2017-2019 жылдары «Нұрлы Жол» аясында автомобиль жолдары жобаларын іске асырудың шырқау шегі кезеңінде барлық жобаларда 200 мың адам, оған қоса цемент, жол битумы, инерт материалдар, темір-бетон бұйымдарын шығару жөніндегі барлық отандық өндірушілер жұмыс істейді», – деді баяндамашы.
«ҚазАвтоЖол» ұлттық компаниясы» АҚ басқарма төрағасы Ермек Қизатов еліміздегі негізгі халықаралық дәліздерге, оның ішінде «Нұрлы Жол» бағдарламасы аясында салынған бөліктерге төлем жүйесін енгізу туралы айтты. Одан басқа, автомобиль жолдарын басқару жөніндегі ұлттық оператордың басшысы жол бойы қызмет көрсетулерді дамыту жоспарлары туралы да хабардар етті.
Қаржы министрінің орынбасары Татьяна Савельева жекелеген жобаларды қаржыландыру барысы туралы есеп берді. Оның айтуынша, 2015 жылы жол құрылысына Ұлттық қордан бөлінген 178 миллиард теңге игерілді, 2016 жылы қаржыландыру көлемі 161,9 миллиард теңгені (Ұлттық қордан 151,3 миллиард теңге, республикалық бюджеттен 10,6 миллиард теңге) құрайды.
Ішкі істер министрлігі Әкімшілік полициясы комитеті төрағасының бірінші орынбасары Әлібек Кеңесбаев жолдағы, оның ішінде автомобиль жолдары құрылысы бөліктеріндегі қозғалыс қауіпсіздігін қамтамасыз ету үшін қабылданған шаралар туралы хабарлады.
Дөңгелек үстел отырысында «Өңір» депутаттық тобының мүшесі сенатор Ерболат Мұқаев және Қарағанды облысы әкімінің орынбасары Шагурашид Мамалинов Батыс Қазақстан және Қарағанды облыстарындағы автомобиль жолдарындағы өзекті мәселелер мен оның келешегі туралы айтты.
Дөңгелек үстелді қорытындылай келіп, «Өңір» депутаттық тобының жетекшісі, Сенаттың Экономикалық саясат және кәсіпкерлік комитетінің мүшесі Михаил Бортник «Нұрлы Жол» бағдарламасын іске асыруға ауқымды қаражат – мемлекеттік те, қарыз ақша да жұмсалатындығын, сондықтан бұл жолдардың құрылысын мұқият қадағалау керектігін атап өтті.
Ләйла ЕДІЛҚЫЗЫ,
«Егемен Қазақстан»
