«Еуразиялық экономикалық одақ шеңберінде ауыл шаруашылығы өсімдіктері тұқымдарының айналысы туралы келісімді ратификациялау туралы» Заң жобасы
Құрметті төраға, құрметті әріптестер!
Заң жобасы туралы Қазақстан Республикасының Ауыл шаруашылығы бірінші вице-министрі толық баяндап берді.
Қаралып отырған келісімнің негізгі мақсаты – Еуразиялық экономикалық одақ шеңберінде тұқымдардың жалпы нарығын дамыту, аталған одаққа мүше мемлекеттердің өсімдік тұқымдарының жалпы ақпараттық ресурсын қалыптастыру, сонымен қатар тұқымның сұрыптық және егу сапасын айқындаудың бірыңғай әдістерін қолдануды қамтамасыз ету болып табылады.
Келісімді ратификациялау сұрыптарды сынау, тұқым саласындағы заңнаманы жетілдіру, еліміздің Еуразиялық экономикалық одақ шеңберінде тұқымдардың жалпы нарығына шығу мүмкіндігін кеңейтуге, селекцияны және тұқым шаруашылығын дамытуды қамтамасыз етуге, сондай-ақ отандық ауыл шаруашылығы өнімдерін бәсекеге қабілеттілігін арттыруға мүмкіндік береді.
Бұл өз кезегінде елдің азық-түлік қауіпсіздігіне өз үлесін қосып, халқымыздың өмір сүру сапасын арттыра түсетіндігі анық.
Тұтастай алғанда Келісім Қазақстан Республикасының ұлттық мүдделеріне сай келеді, ал оны жасау елдегі әлеуметтік-экономикалық және саяси ахуалға оң әсер әкелетіні айқын.
Заң жобасы жұмыс тобының отырысында жан-жақты талқыланып, зерделенді.
Осы айтылғандарды ескере келе, құрметті әріптестер, Сіздерді заң жобасын қолдап, Бас комитетке ұсыныстар мен ескертпелерсіз жолдауды ұсынамын.
Назарларыңызға Рақмет!