ҚР Парламенті Сенатының депутаттары Нұрлан Бекназаров пен Айгүл Қапбарова Шымкент қаласының қоғамдық кеңесінің мүшелерімен кездесті
Сенаторлар оларға VII шақырылымның 2 сессиясы барысында атқарылған жұмыстар туралы айтып, Парламенттің осы сессиядағы қызметі азаматтардың әл-ауқатын арттыру жөніндегі кешенді шаралар мен қоғамдық-саяси бастамаларды іске асыру үшін уақытында заңнамалық қамтамасыз етуге бағытталғанын атап өтті.
Сенаторлар Қоғамдық кеңестер – бұл атқарушы билік органдарымен бірлесіп, ашықтықты қамтамасыз етуде, өзекті мәселелерді шешуде, азаматтардың қажеттіліктерін шешуде зор рөл атқаратын институттар екенін атап өтті.
«Мемлекеттік шешімдерді қабылдау және іске асыру кезінде консультативтік-кеңесші орган ретіндегі қоғамдық кеңестердің жүйелі қызметі адамдардың әл-ауқатын арттыруға және олардың өмір сүру сапасын қамтамасыз етуге мүмкіндік береді», - деді Нұрлан Бекназаров.
Сонымен қатар, сенаторлар мен қоғамдық кеңес мүшелері проблемалық мәселелерді талқылады. Мәселен, кеңес мүшелері оңтүстік өңірдегі бірнеше құс фабрикасы ауыл шаруашылығына субсидиялардың кешігуіне байланысты жабылғанын айтты. Сондай-ақ, құрылыс компанияларының, әсіресе тұрғын үй салушылардың жауапкершілігін заңнамалық күшейту мәселесі көтерілді. Парламентшілер осы кездесуде айтылған мәселелердің бақылауға алынатынын айтты.
«Ашықтық пен әділдік – бүгінгі күннің басты талаптары. Мемлекеттік органдардың бұл бағыттағы жұмысы жүйелі және нәтижелі болуы үшін біз қоғамдық кеңестер жұмысының тиімділігін арттыруға тиіспіз», - деді Айгүл Қапбарова.
(Сенаттың Баспасөз қызметі, 74-72-27)