Новости

Сенат Төрағасының орынбасары Ольга Перепечинаның төрағалық етуімен «ОДМ іске асыру шеңберінде Қазақстанда балама энергия көздерін және «жасыл» технологияларды дамыту» тақырыбы бойынша Орнықты даму саласындағы ұлттық мақсаттар мен міндеттерді іске асыру мониторингі жөніндегі парламенттік комиссияның отырысына дайындық аясында жұмыс кездесуі өтті.

Ольга Перепечина өз сөзінде Қазақстан Париж климаттық келісімінің қатысушысы ретінде неғұрлым әртараптандырылған және «жасыл» экономика қалыптастыруға арналған құрылымдық өзгерістерді бастағанын атап өтті.

«Еліміздегі булану газдары шығарындысының төрттен үш бөлігін құрайтын энергетикалық жүйені терең декарбонизациялау Қазақстандағы трансформацияның негізі болып отыр. Энергетикалық секторды декарбонизациялау бізге екі есе пайда әкелуі керек: көміртегі шығарындысын азайту мен климаттың өзгеру салдарын жұмсарту және таза отынға көшу арқылы атмосфераны ластайтын заттардың шығарындысын азайту», - деді Ольга Перепечина.

Сенаторлар шара барысында сутегі энергетикасын дамытуға инвесторларды тартуға жағдай жасаудың маңыздылығын атап өтті. Депутаттар жергілікті атқарушы органдар барлық қажетті инфрақұрылымды ескере отырып, жаңартылатын энергия көздерінің жобаларына арналған ықтимал жер учаскесін алдын ала белгілеуі тиіс деп санайды.

Экология және табиғи ресурстар министрінің орынбасары Мансұр Ошурбаев «жасыл» технология саласындағы жұмыс туралы айтып берді. Ол Қазақстанда бірқатар заңнамалық құжаттарды қабылдау арқылы жасыл экономикаға көшу үшін ұйымдық-құқықтық негіздер жасалғанын хабарлады.

Кездесуде сондай-ақ «Экономикалық зерттеулер институты» АҚ, «Qazaq Green» жаңартылатын энергия көздері қауымдастығының, Жас ғалымдар альянсының және Сенат жанындағы Жас сарапшылар клубының өкілдері баяндама жасады.