«Талдау мектебі» – Қазақстан Республикасы Парламенті Сенатының қолдауымен іске асырылатын қоғамдық жоба. Мектеп мемлекеттік басқару, ғылыми-сараптамалық қоғамдастық, азаматтық сектор, бұқаралық ақпарат құралдары және т.б. қызметіндегі талдамалық тәсілдердің сапасын арттыру ісіне үлес қосуды көздейді.
Аталған жобаны іске асыру жөнінде 2021 жылы Сенат жанындағы Жас сарапшылар клубы бастама көтерді. Бастаманы ҚР Парламенті Сенатының Төрағасы Мәулен Әшімбаев қолдады.
Мектеп 2022-2024 жылдар аралығында үш мәрте өтті. Онда мемлекеттік қызмет, академиялық және аналитикалық ұйымдар, БАҚ, ұлттық компаниялар, сондай-ақ азаматтық сектордан 200-ге жуық қатысушы білімін жетілдірді.
Курс шеңберінде қатысушылар сенбі күндері 8 апта бойы деректерді жинау мен талдаудың қолданбалы әдістерін меңгереді, сараптамалық материалдарды әзірлеу тәсілдерін жетілдіреді.
Оқу қорытындысында қатысушылардың топтық талдамалық материалдары жинақ үлгісінде жарық көреді. Жинақ Парламент депутаттарына және мүдделі мемлекеттік органдарға жұмыс барысында зерделеу үшін жолданады.
Қатысушыларға белгілі қазақстандық және шетелдік мемлекет қайраткерлері, сарапшылар дәріс оқиды.
