Сенаторлар Петропавлдағы әлеуметтік нысандардың құрылыс алаңдарында болды
Сенат депутаттары Ольга Перепечина мен Әсем Рахметова Солтүстік Қазақстан облысына сапары барысында Петропавлдағы әлеуметтік сала бойынша негізгі жобаларды іске асыру барысымен танысты. Онда тұрғындармен және сарапшылармен өңірді дамытудың басымдықтарын талқылады.
Сенаторлар «Жас Өркен» шағын ауданында балабақша құрылысын да аралады. Олар нысанның қазіргі жағдайымен танысып, жөндеу жұмыстарының қарқынын бағалады. Депутаттар құрылыс сапасы мен аяқталу мерзімдерін сақтау мәселелеріне назар аударды. Жобаны іске асыру мемлекетке қайтарылған қаржы есебінен жүзеге асырылатыны атап өтілді. Бұл сенаторлардың айтуынша, ресурстарды әлеуметтік қажеттіліктің пайдасына қайтадан әділ бөлудің маңыздылығын көрсетеді.
Депутаттар сонымен қатар 144 пәтерлі тұрғын үйдің құрылысында да болды. Сондай-ақ инженерлік желілерге қосылуға және іргелес аумақты абаттандыруға назар аударды.
«Тұрғын үй құрылысы Петропавлдағы басты міндеттің бірі болып қала береді. Тұрғын үйге деген сұраныс, әсіресе жас отбасылар мен алуан түрлі әлеуметтік санаттар арасында әрқашан жоғары екенін көріп отырмыз. Мұндай жобалардың жайлы және қауіпсіздік стандарттарын міндетті түрде сақтай отырып, сапалы және мерзімінде іске асырылуы маңызды», - деп атап өтті Ольга Перепечина.
Депутаттар «Подгора» шағын ауданында су тасқынынан зардап шеккен учаскелерді абаттандыру жобасымен танысты. Әкімдік өкілдерімен жүздесуде қоғамдық кеңістіктер құру жоспарлары талқыланып, инженерлік дайындықтан бастап көгалдандыруға дейінгі кешенді тәсілдің маңыздылығы атап өтілді. Сенаторлар сондай-ақ жаңғыртылған «Қарасай» стадионын аралап, жаттықтырушылармен және спортшылармен сөйлесті.
Манаш Қозыбаев атындағы Солтүстік Қазақстан университетінде өткен кездесу сапардың соңғы аялдамасы болды. Ольга Перепечина мен Әсем Рахметова жаңа ғимарат салу жоспарымен инженерия, цифрлық технологиялар, энергетика және медицина зертханаларымен танысты. Сенаторлар білім беру бағдарламаларын іске асыруды және қазіргі заманғы талаптарға сай кадрлар даярлауды оқытушылармен бірге талқылады.
«Солтүстік Қазақстан университеті мамандарды даярлау жүйесінде ерекше орын алады. Жұмысшы мамандықтар жылы жоғары оқу орындарының тәжірибеге бағдарланған оқу үшін жағдай жасауы және еліміздің барлық өңірінен студенттерді тартуы ерекше маңызды», - деп атап өтті Әсем Рахметова.
Сенаторлар сапар қорытындысы бойынша жобаларды іске асырудың тиімділігін арттыру бойынша бірқатар ұсыныстар айтып, өзекті әлеуметтік міндеттерді шешуде өңірлермен тығыз өзара іс-қимылдың маңыздылығын атап өтті.
